ШҚО-да балаларды оңалту шараларына 4,5 млрд теңге бөлінді
Шығыс Қазақстанда балаларды оңалту қызметінің көкжиегі кеңеюде, деп хабарлайды OkSemey.kz.
Шығыс Қазақстан облысында биыл балаларды медициналық оңалту шараларына 4,5 млрд теңге бөлінді.
«Әлеуметтік медициналық сақтандыру қоры» ШҚО филиалының басшысы Ғалымжан Әбіловтің айтуынша, соңғы жылдары облыста балаларды оңалту шаралары қарқынды жүргізілуде.
Атап айтқанда, заманауи диагностиканы қолдана отырып балаларлы мамандандырылған кешенді емдік-сауықтыру, медициналық-диагностикалық, психологиялық-педагогикалық және әлеуметтік-бейімдеулік сынды көмектер көрсетілуде.
«Соңғы бір жылда 6 мыңнан астам бала оңалту шараларымен, оның ішінде амбулаторлық деңгейде қамтылды. МӘМС аясында балаларды оңалтуға бөлінетін қаржы 2022 жылы біршама артып отыр. Бұл мақсаттарға 4,5 млрд теңге жұмылдырылған», – деді Ғалымжан Әбілов.
Осылайша, балаларды медициналық оңалту қызметтерімен қамту көрсеткіші өсіп, олардың қолжетімділігі артады. Сондай-ақ алдағы уақытта Семей қаласының Перинаталды орталығының базасында балаларды оңалту орталығы ашылады. Жаңа орталықта жылына 600-700 балаға көмек көрсетіледі.
OkSemey.kz
